تجربة شهر من غير الموبايل !

• نشره: Mido
• صنف في: حياتى
• في: أكتوبر 24,2008

مزيج غريب من الراحة النفسية اللى عمرك ما هتحسها الا لو قفلت موبايلك يومين تلاتة وانعزلت عن الدنيا والشغل وبقيت انت الى متحكم تكلم مين وتطنش مين وبين بعض القلق على كمية المكالمات الى فاتتنى تحديدا بخصوص شغل ثم بعد الشغل تيجى الامور الشخصية .
فات كدة شهر بالظبط من ساعة موبايلى ما باظ من نص شهر رمضان تقريبا,كان بسهولة ممكن استعمل اى تليفون لحد ما تليفونى يتصلح بس مشكلتى مبعرفش اتعامل غير مع التليفونات التاتش سكرين حتى لما بمسك تليفون عادى بلاقى صوابعى راحت عالشاشة وبما ان تليفونى ضرب ضربة جامدة مش حاجة بسيطة وبما ان كل الداتا الى انا محتاجها موجودة عليه وبما انى مكنتش متخيل ان الموضوع هيطول اوى كدة وبما انه برضو قولت اجرب الحياة تمشى ازاى من غير موبايل كام يوم قولت اطنش بقى واحط الشريحة فى درج المكتب واستنى لحد ما اشوفلى حل مع القتيل بتاعى ودة الى حصل فعلا ,لحد دلوقتى الموبايل متصلحش والغريبة انى طبيعى جدا بعد الوقت دة حسيت انه نوعا ما الراحة النفسية اكتر بكتير من القلق بخصوص انه يفوتنى تليفون مهم بالعكس دة انا لاول مرة من زمن طويل احس انى مش متقيد بحاجة فى ايدى او جيبى ولا انه يجيى لى تليفون يلغبطلى الدنيا او يلزمنى بأى تكليف على اى مستوى سواء كان الشخصى او الشغل .
دة اكيد رأيى انا بس لان كل الى بيحاول يوصل لى فى الفترة دى ليه رأى تانى خالص بس مش مهم خالص دلوقتى , مش كتير عليا افك قيد من القيود الى محاوطانى طول عمرى لمدة شهر!!
للامانة اكتشفت اهمية الموبايل فى اوقات معينة مثلا لما يكون فيه ميعاد بينى وبين حد معين ومتفقين نتقابل فى مكان محدد وحد فينا يتاخر عالتانى شوية او يكون واقف فى مكان غلط مثلا وتبتدى الاحتمالات تيجى فى دماغك ياترى هوا جه ومشى ولا مجاش اصلا ولا انا واقف غلط او هوا حصل له ظرف او او او بس برضو والله الحياة ماشية من غير موبايل زى الفل بعكس الكلمة اللى بسمعها كل شوية من الناس لما يقولولك احنا مش عارفين الناس زمان كانت عايشة ازاى من غير تليفونات ! طلع انهم كانوا عايشين كويس اوى ومفيش اى مشاكل بس هوا الانسان كدة التكنولوجيا دلعته اوى .