النهاردة كنت البنك بحول فلوس وفوجئت ان البنك مفيهوش عملة كافية عشان اغير المبلغ الى معايا لريال سعودى وبعدين احوله لان زى ما الاستاذ عمر الموظف هناك قالى انه دة لازم يحصل المهم خرجت ادور على مكتب صرافة وكان اقرب واحد مكتب كراون الى فى شارع المحطة فى ميدان الجيزة وبعد ما اخدت 20 دقيقة لحد المكتب وانا اصلا خارج من البنك متاخر والساعة بقت 2 الا تلت الاقى ان مكتب الصرافة برضو معندهوش ريالات كفاية فابتديت ادور على مكتب تانى يفصله شارع السوق فى ميدان الجيزة عن المكان الى انا فيه قولت اهى فرصة ادخل سوق الجيزة الى بسمع عنه اتفرج شوية ايه الى بيحصل جوة وفعلا دخلت لاكتشف ان سوق الجيزة فيه كل حاجة , حد هيقول طبعا ياعم الناصح ماهو سوق ولازم يكون فيه كل حاجة فانا احب اقولك بس انى مكنتش بياع خضار قبل كدة عشان اكون عارف كل التفاصيل دى اى نعم انا الى بنزل اوقات اجيب طلبات البيت بس لسه معنديش الخبرة الكافية الى تخلينى خبير بالاسواق زى حضرتك , المهم بقى انه للى ميعرفش يعنى فانت فى سوق الجيزة تلقى محل كشرى مساحته صغيرة جدا ولكنه مشهور جدا وهو محل الشيخ ودة بيفتح بدرى وبيقفل الضهر او بعد الضهر بشوية وبيغرف للناس الاطباق بايده كدة علطول بس فعلا عليه شوية كشرى يخلوك تنسى اسمك ونضيف على فكرة مع انه بيشتغل بايده ,احلى ما فى الموضوع انى لقيت قدامى ناس فلاحين بيبيعوا تووووووووت وانا مهما اقول مقدرش اوصفلكوا التوت بالنسبة لى ايه , مش بس فاكهة حلوة وبحبها لا الموضوع اكبر من كدة بكتير , رجعت فى ثانية لذكرياتى مع شجرة التوت فى بلد ابويا فى البحيرة لما كنت عايش هناك وانا صغير وافتكرت شجرة التوت على شط عم ابو زيد الله يرحمه والى اكتشفت ان الى زرعها هوا جدى ربنا يديله الصحة وايام ما كنت بتقابل انا واصحابى ونطلع الشجرة وتحولى لقرد بيطلع الشجرة زى ماكون اتولدت عليها وانا فى ايدى كيس بلاستك وشبشبى مركون تحت الشجرة مع شباشب الاخوة الى معايا فوق ثم قضاء حوالى نصف دقيقة من التركيز على اى فرع من الشجرة الضخمة دى هاستقر وادور عالتوت والساعات الى بعد كدة واحنا قاعدين فوق بدون تعب ولا خوف من المسافة الى لو اتزحلقنا ودة شئ وارد وبيحصل بس للناس التانية بس الحمد لله موقعتش معرفش ازاى عالاقل من شجرة التوت وتحتينا شط(شاطئ عم ابو زيد) الله يرحمه وهوا بيزرع الفجل والجرجير والخس ويقعد يرفع المية من الترعة بالشادوف(اتمنى يكون دة اسمه لانى مش فاكر غير الكلمة دى) ومن تحتينا ييجى الناس يقفوا عشان يركبوا يروحوا دسوق او دمنهور او الرحمانية او المحمودية او الناس الى جاية من الاماكن دى واحنا زى ماحنا قاعدين فوق ناكل شوية ونحط شوية فى الشنطة لحد المغرب ننزل نجرى كل واحد على بيته,الكلام دة من 16 سنة مثلا نسيت اسامى اصحابى فى شجرة التوت حتى نسيت هما مين مفضليش غير واحد منهم اكتر من اخويا احمد ابو حسن وسبحان الله لا كان يبان علينا انا وهوا واحنا فوق الشجرة اننا ابدا هنكون زى ماحنا دلوقتى بيتهيالى لو اتعمل 100 سيناريو لمستقبلنا مكانش هيكون منهم الى فعلا احنا عايشينه ولا حتى دراستنا كانت مبينة الكلام دة انا كنت ازهرى واخدت ثانوية ازهرية ثم غيرت مسارى للكمبيوتر ثم للتسويق والتجارة الالكترونية وهوا كان كلية تجارة والنهاردة بقى واحد من اشطر المبرمجين فى مصر بس لسه بنتجمع ونفتكر طفولتنا وجيرتنا وايامنا الحلوة وشجرة التوت.
اه نسيت اقول انى اشتريت كيلو ونص توت وبكتب دلوقتى وانا قدامى طبق كبير متتفضلوا معايا !
