اشمعنى انا يعنى؟
- صنف في: حياتى
- في: أكتوبر 21,2008
بسم الله الرحمن الرحيم
ييجى 9 سنين وكسور دول عمرى عالانترنت مابين شغل و شات وقراية فى كل حتة وتعارف بقالى كل دة ولسه فاكر النهاردة اجى اعمل مدونة مع انى متابع لمدونات كتير بس مش عارف مكنتش حاسس قبل كدة بمتعة فى انى يكون عندى بلوج اقعد اكتب فيه واشارك الناس خبراتى و حاجات بشوفها كل يوم بس ياللا اهو اليوم جه كفاية مقدمات ادينى نويت والنية لله وهاعمل القسم دة فى الموقع مدونة ليا اتكلم فيها عن الى عايز اتكلم فيه او احط صورة عجبتنى صورتها وانا ماشى فى الشارع او لقيتها عالنت ومفيش مانع من كام فيديو يعنى اهو تجديد خاصة ان الى كل واحد بيشوفه كل يوم فيه حجات كتير تستحق تتسجل وتتشارك عالانترنت مع الناس المية مية الى هنا والى هناك والى معزومين والى جايين طفاسة بس عشان دى اول تدوينة حابب اقول انا مين
انا محمد محمود محمد نعمة الله من مواليد 21-1-1981 برج الدلو وطولى 192 سم فى بكالوريوس علوم حاسب ونظم معلومات جامعة 6 اكتوبر(اسوا جامعة فى التاريخ) وحاليا محاضر فى جامعة القاهرة فى مركز البحوث والدراسات التجارية فى مادة جديدة نقدر نقول ان اول مرة تتدرس فى مصر اسمها Search Engine Optimization ودى حاجة متعلقة شوية بمجال الويب ماسترز والتسويق والتجارة الالكترونية مع دكتورنا العزيز دكتور خالد محمد خالد . زمان كنت رياضى بلعب حارس مرمى فى نادى جولدى وبعد مقابلة مع كابتن فكرى صالح مدرب منتخب مصر لحراس المرمى مع كابتن محمود الجوهرى قرر الراجل مشكورا انه يرشحنى للنادى الاهلى او الزمالك حسب اختيارى ولاسباب هو ادرى بيها ولكن لاسبابى انا الى هيا شوية كتير دلع على شوية اصابات على شوية قلة اهتمام قطعت علاقتى بالكورة كحرفة ومهنة مع انى مكنتش ساعتها عارف ان الواحد ممكن يشوف ناس كتير كانوا معاه زمان دلوقتى بيلعبوا فى التلفزيون وبيتدفع فيهم ماشاء الله ارقام فيها 6 اصفار او اقل كل واحد ونصيبه وربنا يكرمهم جميعا وبعد الكورة مسكت فى الكمبيوتر والحمد لله ربنا كرمنى والحياة ماشية الحمد لله تمام لحد دلوقتى
اعتقد كفاية كلام كل دة عشان اقول بس ان دى اول تدوينة ؟ طب خلاص ادينى قولت بما فيه الكفاية الله المستعان بقى والواحد يقدر يقدم مدونة على المستوى المطلوب
محمد محمود نعمة الله
29-2-2008
